IN CAMPU SU MOVIMENTU LINGUISTICU
de Frantizscu Casula
Su Movimentu linguisticu torrat in campu cun sa Carta de S’Alighera, unu documentu de sos partetzipantes a sa sessione de su 10 de nadale a sa Conferèntzia regionale annuale de sa Limba sarda. Est unu decalogu de seighi puntos, iscritos tot’in Sardu, imbiadu comente promemoria a s’Assessore regionale de sa Cultura Milia e, pro connoschèntzia, a ateras autoridades regionales. Si pedint cosas pretzisas ma mescamente: 1. chi in s’Iscola Digitale annuntziada, bi cheret, a tìtulu prenu e in cunditziones de paridade cun sas àteras limbas prevìdidas, sa limba sarda e sas alloglotas in sa presentada de su progetu, in s’isvilupu suo, in sos cuntenutos, In prus, sos chi ant leadu parte in sa Cunferèntzia torrant a nàrrere chi in Sardigna b’at unu nùmeru bastante de espertos chi sunt a tretu de iscrìere cuntenutos locales e universales in sardu e in sas alloglotas pro s’ Iscola Digitale; 2. Chi siant cunfirmados sos impinnos de sas istitutziones prepostas a sa formatzione de sos insinnantes, mescamente s’Universidade de Tàtari, pro chi in sos cursos de formatzione cummissionados e finantziados dae sa RAS, e no in sos laboratòrios ebbia, sas matèrias chi faghent parte de su programa de formatzione las insinnent a su nessi pro su 50% de sas oras in sardu; 3. chi si òperet a manera de otènnere una modìfica costitutzionale pro introduire sa limba sarda in s’Istatutu de Autonomia Ispetziale comente limba natzionale de su pòpulu sardu, cun sa matessi tutela reconnota a sas limbas alloglotas, in sos territòrios rispetivos de cumpetèntzia e àmbitos de difusione; 3. chi, finas pro initziativa de s’Osservatòriu de sa Limba sarda, si fatzant, intro de sos primos meses de su 2012, sas cunferèntzias provintziales cun sos operadores de s’iscola, giai propostas dae s’Osservatòriu regionale, pro leare in cunsideru sas chistiones arresonadas in sa Conferèntzia Regionale, mescamente sos progetos de iscola bilìngue, sa didàtica in sardu, cun riferimentu particulare a sa limba, a sa terminologia, a sas ainas, a sos metodos; 4. chi su Cussìgiu regionale aumentet sos istantziamentos pro sa limba sarda, a manera chi s’Assessoradu a sa cultura potzat destinare a su nessi, pro su 2012, su 2% de su preventivu suo a sa limba sarda, e su 3% pro su 2013.
Amento chi in su Bilanciu de su 2011 s’Assessoradu at destinadu su 0,4%: una brigungia manna!
Pubblicato su SARDEGNA Quotidiano del 16-2-2012