CONTRA A SAS ISCORIAS NUCLEARES: poesia di Maddalena Frau

 

Sa poetessa in limba sarda MADDALENA FRAU

contra a sas iscorias nucleares at iscritu custa poesia

 

 

FORA ISCORIA NUCLEARE

Fora iscoria nucleare

de venenu colorida!

Fora, atesu, mai in sa vida

muntonarzos de nuscare!

Sa Sardinna a la sarvare

est mutinde totu unida!

Est s’iscoria nucleare

de su mundu àliga fea.

Fora de sa terra mea

si la depent interrare

o, si nono, apicare

a su tzugu a vida intrea.

Cussos macos e tinzosos,

chene anima nen coro,

si l’abbratzent su tesoro,

che lingotos pretziosos,

sos bidones putzinosos

a pudire in dom’issoro!

Zai chi totu ant impestau

distruinde sa Natura,

sa moderna butadura

si la tenzant a costau,

a tzimentu fravigau

in sa domo a s’ intradura.

Cherent fagher de Sardinna

muntonarzu natzionale…

regalande unu mortale

crancu ’e vida prus indinna

a sa nostra terra dinna

de bellesa e de gabbale.

No lis bastat su chi ant fatu

in cuddu tempus colau!?

Brusiau e isbuscau…

Cantu dannu e disacatu

pigandeche su recatu

de su populu isfrutau! ….

totu no-che sunt leande

su terrinu e sa salude…

sa betzesa e  zobentude…

A zogu nos sunt pigande.

Pesae totus cantande

a difender sa salude!

E sos amministradores

no atzètent cosa gai!

In Sardinna mai mai!…

Solu matas e fiores

e profumos e colores

in sa terra de mannai!…

A sas Istitutziones

de Guvernu Italianu

lis pedimus una manu

de rispetu a sas pessones

de sas generatziones

de su populu isolanu.

A sos sardos un’apellu

cun corazu cherzo dare:

fortemente a refudare

de nos ponner a tropellu

che a bestias de masellu

prontos a no-che papare.

Fortes, cun coro galanu,

iscritores, zornalistas,

cun poetas e artistas

ischidae a su manzanu…

A s’ingannu rufianu

aberìe sas pibiristas!

Si nde peset su Nuraghe

cun Zigante ’e Monte ’e Prama,

de Sardinna antiga fama,

narande:-Cherimus paghe!

Rezistrae in su condaghe:

“Fora iscoria dae Mama!

Fora, atesu sos bidones

de cuss’aliga de morte!

Fora de sa nostra corte

fragos de perditziones!

Fora iscorias e cannones,

e de imbentos de morte!”-

Sardos, amigos, cantade

disterrados cun amore

pro difender cun ardore

cudda sarda dinnidade,

de Sardinna identidade,

de cultura e de valore!

Fora, atesu fuliade

sas iscorias de dolore!

Sa Sardinna est de mirare!

Non si vendet pro dinare!!!

Sa Sardinna est de mirare!

Fora iscoria nucleare!

de MADDALENA FRAU

 

CONTRA A SAS ISCORIAS NUCLEARES: poesia di Maddalena Frauultima modifica: 2015-01-19T17:15:11+01:00da zicu1
Reposta per primo quest’articolo

Lascia un commento