IN UNA PRATZA
A CHISTIONARE
DE LIMBA SARDA
di Francesco Casula
Unu sero in una Pratza de Casteddu in su cuartiere de Villanova. A faeddare de limba sarda. Antzis: a faeddare in limba sarda. In medas. Mescamente giovanos e feminas. Intelletuales, giornalistas, istudiosos e amantiosos de su Sardu. Unu muntone. In unu atobiu oldinzadu, gratzias a Matteo Murgia e a s’assòtziu “Don Chisciotte”. Pro unu cunfrontu liberu subra su deretu a sa limba; subra su tempus benidore de su Sardu. “Pro chie – ant iscritu sos organizadores in Facebook – non si betat su picu a pees, pro chie non si mòssigat sa limba, pro chie no iscudit s’ossu arrabiosu a sa camba de sa mesa a posta, pro chie no andat a fàghere su tifu a sa Juve in curva nord in Casteddu, pro chie non s’intèndet discriminadu dae sa limba sua… “. S’atobiu est istadu detzisu a pustis sa dibata in su Consigiu comunale de Casteddu subra sa possibilidade de introduire in sos Cuncursos publicos sa limba sarda comente materia de sas proas. Ma in sa pratza de Casteddu ant allegadu peri de ateras chistiones e ant fatu pretzisas propostas. Casteddu, sa capitale de sa Sardigna pro su Sardu no est faghende nudda. No tenet mancu “S’Ufitziu pro sa limba sarda”: una birgonguia manna! Lu tenent deghinas e deghinas de biddas e bidditzolas e Casteddu nono! It’est aisetende a l’istituire? Ma sos cussigieris de su Comune de Casteddu connoschent sas lees subra s’amparu e s’avaloramentu de su Sardu? A comintzare dae sa lee regionale 26 (de su 1997) “la Regione assume come beni fondamentali da valorizzare la lingua sarda – riconoscendole pari dignità rispetto alla lingua italiana”, e sa lee istatale 482 (de su 1999) chi riconnoschet su Sardu comente limba de una minoria linguistica istorica? Ischint duncas sos cussigieris de Casteddu chi no b’at peruna dificultade normativa e legislativa chi potat impedumare a su sardu de fagher parte de sas materias de sos Cuncursos? Ma, a parte custa chistione, est mai possibile chi sa capitale de sa Natzione sarda no fagat nudda pro sa limba nostra? E cheret diventare capitale mediterranea? O cussigieris: ma sezis macos, tontos o iscassiados? O solu innorantes? Proae a imaginare Barcellona sena sa limba catalana? In sa toponomastica, comente in sos giornales, in sas televisiones e mescamente in sas iscolas? No diat esistere! Duncas, Casteddu, amentende sos omines e sas feminas tuas de gabale, chi ant istimadu e impreadu su Sardu: dae Sigismondo Arquer a Efisio Pintor Sirigu, dae Teresa Mundula a Aquilino Cannas, moedinde pro avalorare sa Limba sarda.
Pubblicato su SARDEGNA Quotidiano del 18- 7-2013