Bi sunt medas limbas sardas? No, solu una.
de Frantziscu Casula
Arresonende e chistionende cun sos istudentes ma puru cun sos mastros e professores de medas iscolas de sa Sardigna in ue a s’ispissu ando pro faghere cursos de limba sarda, sa pregonta chi prus che totu mi ponent est custa: cale limba?
Su Sardu –mi narant- est partzidu in medas variantes e duncas est difìtzile a l’impreare in s’Iscola e in s’ufitzialidade.
Chi su Sardu siat partzidu in medas variantes –ma sas printzipales sunt duas: campidanese e logudorese- est beru e frassu in su matessi tempus, proite sa Limba sarda in sa sustàntzia est una ebia, ca su chi càmbiat no est sa sustàntzia chi format una limba: sa sintassi, sa gramàtica, ecc. ma prus che totu sa fonètica, sos sonos de sas paràulas o sas desinentzias: andare » (log.) ; andai (camp.) ; morrere » (log.), morri (camp) ecc. Tzertu bi sunt puru diversidades intre sas paràulas, dae unu logu a s’ateru, ma custu est una richesa no una debilesa.
Ma si allogamus custa chistione, chie nos proibit oe de unificare o, comente narant sos istudiosos, de ”istandardizare” sa Limba sarda, pro tennere, comente pòpulu e comente Nazione, una bandela linguistica unitaria?
In custa diretzione andat sa proposta fatta –a pustis annos e annos de batallas- dae sa Commissione nominada dae Soru e giamada “Limba sarda comuna”. Tocat de comintzare a l’impreare semper, comente limba ufitziale paris cun s’Italianu: in s’Iscola, in sa toponomastica, in sa publicidade, in totu sos medios modernos de sa comunicazione (giornales, Rai-TV, Internet).
(pubblicato su Il Sardegna il 21 Gennaio 2008)