Universitarios in campu pro sa limba
di Francesco Casula
Sos dischentes de s’Universidade de Tatari falant in campu a favore de sa limba sarda. S’atera die unu frustiu de su sotziu “Su Majolu”, a pustis de aer arregollidu milli firmas, ant presentadu a sos medios de comunicatzione una petitzione in ue pedint a sa autoridades iscolasticas e politicas (a sos Retores de s’Universidade de Tàtari e de Casteddu, a su Presidente de sa Regione, a su Cossigiu regionale ecc) isseberos pertzisos a favore de su Sardu. Sos universitarios sunt cumbintos chi pro pònnere su sardu comente matéria de istúdiu e manizare su sardu in sa didàtica in totu sas iscolas primàrias e segundàrias de sa Sardigna, tocat de amanitzare in presse su personale docente E sigomente pro fàghere sa professione docente bi cheret una làurea chi assiguret sa formatzione netzessària professionale e iscientífica de sos mastros, cheret chi a totu cuddos chi punnant a fàghere custa professione si lis cuncordet apostadamente unu Cursu de laurea chi sas Universidades sardas tenent su pertzisu dovere de istituire. In custa diretzione pedint s’istitutzione, pro s’annu 2012-2013 de unu cursu de làurea pro sa “Formatzione Primària in Limba Sarda”, abilitante a sa docentza in sardu e a sa didàtica de su sardu in sas iscolas elementares e prima iscola, e semper pro s’annu benidore, unu cursu de làurea in “Limba e Literadura Sarda”, abilitante a sa docentza de su sardu e de àteras matérias umanísticas in sas iscolas medias e superiores. Pro totu su chi pertocat sa formatzione chi custu cursu si proponet, a totu cuddos chi ant a èssere docentes de sardu, a prus de cantu s’istúdiat cun sos cursos de laurea in Literas, si lis depet imparare sa limba sarda faeddada e iscrita, linguistica e glottologia de su Sardu, sas printzipales propostas de regularizatzione istandard fintzas pro unu probàbile isséberu, in sos annos benidores, de unu Sardu istandard non solu pro sos documentos in essida a manizu de sa regione sarda, ma fintzas pro l’impitare in sos ufítzios públicos e in sas iscolas.
S’Universidade, comente istitutzione, at tentu semper s’impreu de omologare in sa limba italiana totu sos tzitadinos de s’Istadu italianu: issa in Sardigna tenet una responsabilidade manna e grave in s’iscontróriu e s’irbandonu de sa limba e de sa cultura sarda. Tocat chi remediet a totu sos dannos e guastos chi at fatu e sighit a faghere.
Pubblicato su SARDEGNA quotidiano del 23-4-2012