Ecco un’altra bella poesia di Franciscu Carlini.
BALENTI
T’intendis mannu
dilinquenteddu biancu nasciu in s’óru de s’Hudson
dilinquenteddu nieddu
scendiau in s’óru de su grandu Mississippi
innui is mannus tuus fiant cristus chi cantànt spirituals
crucifissaus
a sa gruxi de is prantadoris de cotoni,
mannu mannu t’intendis
dominadori de su mundu
ananti
de custus arabus, su corpus disamparau
asutta de tùnicas biancas longas a peis.
Cantu dinai po occiri e suppliziai
quanto mannu t’intendis asuba de unu carramau
de s’artaria de unu elicòtteru
de s’artaria de is celus
tui chi sa morti mandas
e no bis o ti spàssiat,
sa morti chi imponis a genti
sconnóscia e malintranniada
chi t’ant contau po ti ndi bogai is dudas.
De sa morti sa democrazìa,
de is petrolleris
de sa Coca Cola
de is amburgus mauccheddus aromataus
de fabbricadoris de armas de paxi.
T’intendis stremenau,
pertixedda
chi scambittas óru-óru de su culu mannu
de su carabineri biancu ’e su mundu.
Tui no ses de is sordaus
chi ant traessau is bias de medas piccinnìas,
american bombon american bombon,
tui no ses unu de is balentis de is pellìculas
chi ant sderrutu is monstrus in is pesadiglias
de piccioccheddus spramaus.
Su menisprezziu po is àterus
pèsat su fogu de su miu po tui
chi fais su chi t’ant imparau
e cussu puru chi ti parit.
A tui totu est permittiu
permittiu totu,
insidigàbili mèri assumancu una borta
comenti t’ant sempri repitiu
de candu in su muntonarxu de una metròpoli
o in d’una biddixedda
spérdia in su grandu paisu de s’America
tui e is cumpangius tuus
andestis forroghendi
sa merda in is bandonis mannus de sa ricchesa.
Su nemigu che cani accappiau a unu loru,
bagassedda a sigaretta in bucca
chi no t’iat a minèsciri mancu s’aggraviu
cun su coru
unu campusantu de tristura spantada,
de dolori airau.
Tui piccioccu de su Nord
tui piccioccu de su Sud,
no seis is giovunus passaus triunfantis
in is bias de una piccinnìa attesu,
povinas is pipìus eis occius chi zerriànt
american bombon american bombon,
interrau eis po sempri sa giovunesa
prus de is annus, de totu is annus longus
passaus abettendi de badas.